बामणी (ता. अर्धापूर, जि. नांदेड) हे महाराष्ट्र राज्यातील नांदेड जिल्ह्यातील अर्धापूर तालुक्यात वसलेले एक महत्त्वाचे व विकासशील गाव आहे. हे गाव नांदेड जिल्ह्याच्या मुख्यालयापासून सुमारे ८ किलोमीटर अंतरावर असून अर्धापूर तालुक्याच्या ठिकाणापासून सुमारे ५ किलोमीटर अंतरावर आहे. सोयीस्कर भौगोलिक स्थान, चांगली दळणवळण व्यवस्था आणि शेतीस पोषक वातावरण यामुळे बामणी गावाचा सामाजिक व आर्थिक विकास सातत्याने होत आहे.

सन २०११ च्या जनगणनेनुसार बामणी गावाची एकूण लोकसंख्या १,९६५ असून ४३६ कुटुंबे येथे वास्तव्यास आहेत. गावाचे एकूण क्षेत्रफळ ५१४ हेक्टर आहे. गावातील लोकसंख्या प्रामुख्याने शेती, दुग्धव्यवसाय व संबंधित पूरक व्यवसायांवर अवलंबून आहे. बामणी हे गाव विशेषतः हळद व केळी उत्पादनासाठी प्रसिद्ध आहे.

शैक्षणिक दृष्ट्या गाव प्रगतीपथावर असून ग्रामपंचायत अंतर्गत ३ जिल्हा परिषद शाळा व ४ अंगणवाड्या कार्यरत आहेत. गावातील साक्षरतेचे प्रमाण समाधानकारक असून सुमारे ८२% पुरुष व ६०% महिला साक्षर आहेत. शाळा व अंगणवाडी इमारतींची दुरुस्ती, रंगरंगोटी आणि आधुनिक सुविधा उपलब्ध करून देण्यासाठी ग्रामपंचायतीकडून सातत्याने प्रयत्न केले जात आहेत.

बामणी ग्रामपंचायत ही गट ग्रामपंचायत असून तिच्या अंतर्गत निजामपूर व वाहेतपूर या वाड्यांचा समावेश आहे. गावात प्रसिद्ध दक्षिणमुखी हनुमान मंदिर हे एक महत्त्वाचे धार्मिक स्थळ असून भाविकांसाठी श्रद्धास्थान आहे. तसेच गावातील स्मशानभूमी, सार्वजनिक सुविधा व स्वच्छतेच्या कामांमुळे गावाचे सौंदर्य व आरोग्यदृष्ट्या स्तर उंचावला आहे.

ग्रामपंचायत बामणी अंतर्गत बंदिस्त नाल्या, सीसी रस्ते, सार्वजनिक शौचालये, शाळा दुरुस्ती, सेग्रीकेशन शेड अशा विविध विकासकामांची अंमलबजावणी करण्यात आली आहे. मुख्यमंत्री समृद्ध पंचायत राज अभियान अंतर्गत सीसीटीव्ही बसवणे, ऑक्सीजन पार्क, आयुष्यमान भारत कार्ड कॅम्प, महिलांचे आरोग्य तपासणी शिबिर, स्वच्छता मोहिमा, घंटागाडी व्यवस्था, जलसंधारणाची कामे, रेन वॉटर हार्वेस्टिंग व सोलार प्रकल्पाचे नियोजन यांसारखी महत्त्वपूर्ण कामे यशस्वीपणे राबवली जात आहेत.

लोकसहभाग, पारदर्शक प्रशासन आणि शासकीय योजनांच्या प्रभावी अंमलबजावणीमुळे बामणी गावाचा सर्वांगीण विकास साधला जात आहे. भविष्यात बामणी ग्रामपंचायत ही एक आदर्श, स्वच्छ, समृद्ध व प्रगत ग्रामपंचायत म्हणून नावारूपाला येईल, असा ठाम विश्वास आहे.